සම්පාදනය:
ආචාර්ය වරුණ චන්ද්රකීර්ති
076 – 936 6371 | iamwaruna@yahoo.com
ජ්යෙෂ්ඨ කථිකාචාර්ය සුමේධ වීරවර්ධන
076 – 229 0865 | sumedha.nef@gmail.com
අප විසින් ඉදිරිපත් කරනු ලබන
මෙම යෝජනා මාලාව
බුද්ධ ශාසනයෙහි චිරස්ථිතිය සඳහා
හේතු කාරක වේවා!
2020 ජනවාරි
හැඳින්වීම
ජාතියක් වශයෙන් ඈත අතීතයේ සිට ම අපට පොදු අරමුණක් වෙයි. ඒ අන් කිසිවක් නොව බුද්ධ ශාසනයේ චිරස්ථිතිය ය. මහා විහාරය ස්ථාපනය කිරීමේ දී ද, දුටුගැමුණු රජු විසින් ආක්රමණිකයාගෙන් රට මුදා ගැනීමට කළ සටනේ දී ද, ත්රිපිටකය ග්රන්ථාරූඪ කිරීමේ දී ද, අටුවා ලිවීමේ දී ද, පොළොන්නරුවේ මහා ශාසන ශෝධන කාර්යයේ දී ද, දඹදෙණිය යුගයේ දී ධර්ම ග්රන්ථ ලිවීමේ දී ද, නැවත උපසම්පදාව හඳුන්වා දීමේ දී ද, බ්රිතාන්යය කිරීටයට අප රටෙහි පාලනය පවරා දුන් ගිවිසුමේ දී ද, අවසාන වශයෙන් අප විසින් සම්පාදනය කරගත් ජනරජ ව්යවස්ථා දෙකෙහි ම ද මෙම උදාර වූ කාර්යය අප විසින් අවධාරණය කරනු ලැබ තිබේ.
බුද්ධ ශාසනය සුරක්ෂිත වන තාක් කල් අප ජාතියක් වශයෙන් ආරක්ෂා වනු නිසැක ය. එහෙයින් අපි බුද්ධ ශාසනයෙහි චිරස්ථිතිය වෙනුවෙන්, එහි ආරක්ෂාව වෙනුවෙන් ජාතියේ සතුරන් සමඟ සටන් වැදීමට ද කටයුතු කර ඇත්තෙමු. එයින් නො නැවතී අපගේ උතුම් ථෙරවාදී ශාසනය අග්නිදිග ආසියාතික රාජ්යයන් තුළ ස්ථාපිත කරවීමට ද අපි කටයුතු කර ඇත්තෙමු. ලන්දේසි පාලන කාලය තුළ අපගේ ශාසන සම්ප්රදායයන් අනතුරට මුහුණ පෑ විට අප නැවතත් උපසම්පදාව ලබා ගත්තේ අප විසින් ම මුල් බුද්ධ ශාසනය ස්ථාපිත කළ තායිලන්තය (සියමය) සහ මියන්මාරය (අමරපුර සහ රාමඤ්ඤ) යන රටවලිනි.
එහෙයින් අග්නිදිග ආසියාතික රටවල් සහ ආශ්රිත ප්රදේශ සමඟ අප පවත්වන විදේශ සබඳතා බුද්ධ ශාසනයෙහි චිරස්ථිතියට අදාළ මූලික අවශ්යතාවක් ලෙසින් අපි හඳුනාගෙන සිටිමු. මෙම යෝජනා මාලාව ඉදිරිපත් කරනු ලබන්නේ උක්ත අවබෝධය පදනම් කරගෙන ය.
ශ්රී ලංකාව ප්රමුඛ කරගත් මියන්මාරය, තායිලන්තය, කාම්බෝජය, ලාඕසය යන රටවල්වල ද, දකුණු වියට්නාමයේ ද, චීනයේ යුන්නාන් පළාතට අයත් ශිෂුඅන්පන්නා ප්රදේශයේ ද ජනතාව ථෙරවාද බුදුදහම අනුගමනය කරනු ලබයි. එහෙයින් මෙම රාජ්යයන්ගෙන් සහ ප්රදේශවලින් ආවරණය වන ප්රදේශය “ථෙරවාද කලාපය” ලෙසින් හැඳින්වෙයි. “ථෙරවාද කලාපයේ රටවල් සමඟ විදේශ සබඳතා පැවැත්වීම” ලෙසින් මෙම යෝජනා මාලාව නම් කෙරී ඇත්තේ ද එබැවිනි.
එහෙයින් මියන්මාරය, තායිලන්තය, කාම්බෝජය, ලාඕසය, වියට්නාමය සහ චීනය සමඟ අප පවත්වන විදේශ සබඳතා අපගේ ජාතික අරමුණ වන බුද්ධ ශාසනයේ චිරස්ථිතියට අදාළ වන අයුරින් ප්රතිසංවිධානය කරගැනීම මෙම යෝජනා මාලාවේ මූලික ම අරමුණ වේ.
තව ද ථෙරවාද කලාපයේ අනෙකුත් රාජ්යයන්ගේ සහ ප්රදේශවල වසන බෞද්ධ ජනතාව විසින් අපගේ රට ඔවුන් පිළිපදින බුදු දහමෙහි මහ ගෙදර වශයෙන් සළකනු ලබන සම්ප්රදායයක් ද පැවැතුණි. ඔවුහු තවමත් ඒ පිළිබඳ ව තම අදහස් පළකිරීම ඒ සඳහා නිදසුනක් වශයෙන් දැක්විය හැකි ය. ශ්රී ලංකාව යනු ථෙරවාද කලාපය නිරූපණය වන මකරාගේ හිස ලෙසින් ද තමන්ගේ ප්රදේශය එම මකරාගේ වල්ගය ලෙසින් ද චීනයේ යුන්නාන් පළාතට අයත් ශිෂුඅන්පන්නා ප්රදේශයේ ජනතාව හඳුන්වති. කතෝලික ජනතාව විසින් තම ආගමික මූලස්ථානය ලෙසට වතිකානුව සළකන අයුරින් ම, මුස්ලිම් ජනතාව විසින් තම ආගමික මූලස්ථානය ලෙසට සෞදි අරාබිය සළකන අයුරින් ම, තන්ත්රයාන බුදු දහම පිළිපදින ජනතාව විසින් තම ආගමික මූලස්ථානය ලෙසට චීනයේ ටිබෙටය සළකන අයුරින් ම, ථෙරවාද බුදු දහම පිළිපදින සියලු ජනතාව විසින් තම ආගමික මූලස්ථානය ලෙසට ශ්රී ලංකාව සළකයි.
ථෙරවාද කලාපය තුළ ජීවත්වන අප විසින් බෙදා හදා ගනු ලැබ ඇත්තේ අපගේ ශාසනික සම්ප්රදායයන් පමණක් ම ද නොවේ. අපගේ අවුරුදු සැමරීම් වැනි චාරිත්ර, භාෂා සම්ප්රදායයන් වැනි සංස්කෘතික අංගෝපාංග විශාල ප්රමාණයක් ද අපි එකිනෙකා අතර බෙදා හදාගෙන සිටිමු.
කෙසේ වුව ද, පසුගිය කාලයේ දී අපගේ විදේශ ප්රතිපත්තිය ක්රියාත්මක කිරීමේ දී බුද්ධ ශාසනයේ චිරස්ථිතිය යන ජාතික අරමුණ අමතක කර කටයුතු කිරීම නිසා කලාපය තුළ අපගේ ප්රමුඛතාව ද ඒ තුළින් අප හට ලබා ගත හැකි ශාසනික, සමාජයීය, සංස්කෘතික, දේශපාලනික සහ ආර්ථික ප්රතිලාභ ද සැළකිය යුතු මට්ටමකින් අහිමි කරගෙන සිටිමු. කාම්බෝජය සහ ලාඕසය යන රාජ්යයන් සමඟ සෘජු රාජ තාන්ත්රික සබඳතා පැවැත්වීම ද අපට මග හැරී තිබේ.
මෙම අතපසුවීම වහා නිවැරැදි කරගත යුතු ව තිබේ. අපගේ උතුම් ජාතික අරමුණ හොඳින් අවබෝධ කරගත් ගෝඨාභය රාජපක්ෂ මැතිඳුන් ජනාධිපති ධුරයට පත් වී තිබෙන මෙම මොහොතේ බුද්ධ ශාසනයේ චිරස්ථිතිය සහ ජාතියේ සමාජ - ආර්ථික අභිවෘද්ධිය වෙනුවෙන් ථෙරවාද කලාපය සමඟ මනා සබඳතා තහවුරු කරගෙන ඉතා සක්රීය සහ අර්ථාන්විත රාජ තාන්ත්රික කටයුතු පැවැත්වීම ඉතා ශක්තිමත් කළ හැකි බව අපගේ විශ්වාසයයි. එහෙයින් එම විශ්වාසය මත පදනම් වී උක්ත අරමුණු සාක්ෂාත් කරගැනීම උදෙසා මෙම යෝජනා මාලාව අපි මෙසේ ඉදිරිපත් කරන්නෙමු.
චිරං රක්ඛන්තු බුද්ධ සාසනං
චිරං රක්ඛන්තු ලංකා දීපං
1 වැනි යෝජනාව - කාම්බෝජය සහ ලාඕසය සමඟ තානාපති සබඳතා ඇති කරගැනීම
ථෙරවාදි කලාපයට අයත් බෞද්ධ රාජ්යයන් අතුරින් දැනට අප තානාපති සබඳතා පවත්වන්නේ මියන්මාරය සහ තායිලන්තය සමග පමණි. අවුරුදු දහස් ගණනක් අතීතයට විහිදෙන ශාසනික, සමාජයීය සහ සංස්කෘතික සබඳතා තිබුණ ද අප තවමත් කාම්බෝජය සහ ලාඕසය සමග තානාපති සබඳතා ඇති කරගෙන නැත. එහෙයින් ඉතාමත් කෙටි කාලයක් තුළ මෙම රටවල් දෙක සමග තානාපති සබඳතා ඇති කරගැනීමට කටයුතු කරන මෙන් අපි මෙයින් යෝජනා කර සිටිමු.
2 වැනි යෝජනාව - චීනයේ යුන්-නාන් පළාතේ කුන්-මිං නගරයේ ශ්රී ලංකා ප්රදූත කටයුතු (කොන්සියුලර්) කාර්යාලයක් පිහිටුවීම
චීනයේ ථෙරවාදි බුදු දහම ව්යාප්ත වී ඇති නිරිතදිග යුන්-නාන් පළාතට අයත් ශිෂුඅන්පන්නා ප්රදේශයෙහි ය. චීනයේ ශ්රී ලංකා තානාපති කාර්යාලය පිහිටා ඇති පෙයි-චිං නගරයේ සිට ශිෂුඅන්පන්නා ප්රදේශයට ඇති දුර කිලෝ මීටර් 3100 ක් පමණ වේ. ශ්රී ලංකා පුදූත කාර්යාලයක් පිහිටා ඇති ශං-හයි නගරයේ සිට ශිෂුඅන්පන්නා ප්රදේශයට ඇති දුර කිලෝ මීටර් 2900 ක් පමණ වේ. ශ්රී ලංකා ප්රදූත කාර්යාලයක් පිහිටා ඇති කුඅන්-චෝ නගරයේ සිට ශිෂුඅන්පන්නා ප්රදේශයට ඇති දුර කිලෝ මීටර් 1800 ක් පමණ වේ. එහෙයින් එම කාර්යාලවල සිට ශිෂුඅන්පන්නා ප්රදේශය සමඟ සබඳතා පැවැත්වීම ඉතාමත් දුෂ්කර ය.
එහෙයින් යුන්-නාන් පළාතේ පාලන මධ්යස්ථානය වන කුන්-මිං නගරයෙහි (එම නගරයේ සිට ශිෂුඅන්පන්නා ප්රදේශයට ඇති දුර කිලෝ මීටර් 500 ක් පමණ වේ) ශ්රී ලංකා ප්රදූත කටයුතු (කොන්සියුලර්) කාර්යාලයක් පිහිටුවීමට කටයුතු කරන මෙන් අපි මෙයින් යෝජනා කර සිටිමු.
3 වැනි යෝජනාව - වියට්නාමයේ හො-චි-මිං නගරයේ ශ්රී ලංකා ප්රදූත කටයුතු (කොන්සියුලර්) කාර්යාලයක් පිහිටුවීම
වියට්නාමයේ ථෙරවාද බුදු දහම ප්රචලිත වී ඇත්තේ එ රට මධ්යම සහ දකුණු ප්රදේශවල ය. ඈත ඉතිහාසයේ දී අප ශාසනික, සමාජයීය සහ සංස්කෘතික සබදතා පැවැත්වූයේ ද එම ප්රදේශයේ පිහිටා තිබුණු චම්පා රාජ්යයත් සමඟ ය. වර්තමානයේ දී එම ප්රදේශය ද වියට්නාම පාලනයට අයත් ය. වියට්නාමයේ ශ්රී ලංකා තානාපති කාර්යාලය පිහිටා ඇත්තේ හැනෝයි නගරයේ ය. වියට්නාමයේ පදිංචි වී සිටින ශ්රී ලාංකිකයකු 2014 වසරේ සිට ගරු සේවා ප්රදූතයකු (Honorary Consul) වශයෙන් හො-චි-මිං නගරයට පත් කරනු ලැබ තිබේ. එ නමුදු, කොමියුනිස්ට් පාලනයක් පවතින වියට්නාමයේ ආගමික කටයුතුවල නිරත වීමට නම් පූර්ණ බලතල පැවරුනු ප්රදූත කටයුතු කාර්යාලයක් හො-චි-මිං නගරයේ පිහිටුවිය යුතු වේ.
4 වැනි යෝජනාව - ථෙරවාදි කලාපයට අයත් රටවල සහ ආශ්රිත ප්රදේශවල රාජතාන්ත්රික කටයුතු සඳහා අදාළ විෂයය කරුණු පිළිබඳ දැනුම, හැකියාව සහ උවමනාව ඇති පිරිසක් පත්කිරීම
ථෙරවාද කලාපය සමඟ රාජ තාන්ත්රික සබඳතා පැවැත්වීමේ මූලික අරමුණ වනුයේ බුද්ධ ශාසනයෙහි චිරස්ථිතිය ය. එහෙයින් එම රටවල දැනට පිහිටා ඇති සහ මෙම යෝජනා මාලාවේ සඳහන් පරිදි ඉදිරියේ දී පිහිටුවනු ලබන තානාපති කාර්යාලවලට සහ ප්රදූත කටයුතු (කොන්සියුලර්) කාර්යාලවලට නිලධාරීන් පත් කර යැවීමේ දී අදාළ විෂයය කරුණු පිළිබඳ දැනුම, හැකියාව සහ උවමනාව ඇති පිරිසක් පත් කරන මෙන් අපි මෙයින් ඉල්ලා සිටිමු. ඒ සඳහා සුදුසු යැයි අප සිතන පුද්ගලයන්ගේ නාම ලේඛනයක් ද මෙම යෝජනා මාලාවට අමුණා තිබේ.
5 වැනි යෝජනාව - ථෙරවාදි කලාපයට අයත් රටවල සහ ප්රදේශවල ශාසනික කටයුතු, භාෂා ශාස්ත්ර සම්ප්රදායයන්, සමාජ - සංස්කෘතික කටයුතු පිළිබඳ විමර්ශනය සඳහා විමර්ශන සහ පර්යේෂණ නිලධාරීන් පත්කිරීම
ථෙරවාදි කලාපයේ රාජ්යයන් සහ ප්රදේශ සමඟ අප පවත්වනු ලබන රාජතාන්ත්රික කටයුතු සාර්ථක කරගැනීමට සහ තව තවත් වර්ධනය කරගැනීමට නම් එම රටවල සහ ප්රදේශවල ශාසනික කටයුතු, භාෂා ශාස්ත්ර සම්ප්රදායයන්, සමාජ - සංස්කෘතික කටයුතු පිළිබඳ මනා අවබෝධයක් අප විසින් ඇති කරගත යුතු වේ. මෙය අපගේ විදේශ සබඳතාවලට අදාළ පර්යේෂණ සහ සංවර්ධන කාර්යයකි. එහෙයින් එම කාර්යයන්ගේ පූර්ණ කාලීන ව නිරත විය හැකි විමර්ශන සහ පර්යේෂණ නිලධාරින් පිරිසක් උක්ත තානාපති කාර්යාලවලට සහ ප්රදූත කටයුතු කාර්යාලවලට පත් කරන මෙන් අපි මෙයින් යෝජනා කරමු.
6 වැනි යෝජනාව - බෞද්ධ අධ්යයන කටයුතු සහ බෞද්ධ සංචාරක කටයුතු මුල් කරගත් කලාපීය හුවමාරු වැඩපිළිවෙළක් ආරම්භ කිරීම
ථෙරවාද කලාපය තුළ අප රටට ඇති ප්රමුඛතාව තහවුරු කළ හැක්කේ කලාපයේ අනෙකුත් රටවල සහ ප්රදේශවල සිට අප රටට පැමිණෙන බෞද්ධයන්ගේ ප්රමාණය ඉහළ දැමීමට කටයුතු කිරීම මඟිනි. මේ සඳහා ශ්රී ලංකාව මුල් කරගත් බෞද්ධ අධ්යාපන කටයුතු සහ බෞද්ධ සංචාරක කටයුතු ප්රවර්ධනය කළ යුතු වේ. ථෙරවාද කලාපය තුළ දැනට ඇති සහ ඉදිරියේ දී පිහිටුවන තානාපති කාර්යාල සහ ප්රදූත කටයුතු කාර්යාල ද ශ්රී ලංකාව තුළ පිහිටා ඇති අදාළ විෂයය භාර ආයතන ද සම්බන්ධීකරණයෙන් මෙම කාර්යය සඳහා වන විධිමත් වැඩපිළිවෙළක් ආරම්භ කළ යුතු වේ. ඒ සඳහා අදාළ ආයතනික පහසුකම් වැඩි කිරීම ද, පවත්නා ආයතනවල අවශ්ය වෙනස්කම් සිදු කිරීම ද අත්යාවශ්ය වේ. මේ සියල්ල ආවරණය වන නිශ්චිත වැඩපිළිවෙළක් යෝජනා කිරීමට ද අපි බලාපොරොත්තු වෙමු.
7 වැනි යෝජනාව - ජාත්යන්තර මට්ටමේ පාලි භාෂා විභාගයක් පැවැත්වීම
අතීතයේ දී ථෙරවාද කලාපයේ සබඳතා පැවැත්වූයේ පාලි භාෂාව මුල් කරගෙන ය. අදට ද කලාපයේ සෑම රටක ම සහ ප්රදේශයක ම ශාසනික කටයුතු සඳහා පාලි භාෂාව ව්යවහාර කෙරෙයි. අතීතයේ දී පාලි භාෂාව සම්මත අයුරින් ආරක්ෂා කරගෙන යෑම සිදු කරනු ලැබුවේ ශ්රී ලාංකිය භික්ෂූන්වහන්සේලා සහ පඬිවරුන් විසිනි. ඒ සඳහා කලාපයේ අනෙක් අයට අවශ්ය ගුරු හරුකම් සහ මගපෙන්වීම අප රටෙන් ලබා දුන්නේ ය. වර්තමානයේ දී ද අදාළ කාර්යය නිසි අයුරින් සිදු කිරීම අපගේ වගකීම වෙයි. එහෙයින් ඒ සඳහා උපස්ථම්භක වන ජාත්යන්තර මට්ටමේ පාලි භාෂා විභාගයක් පැවැත්විය යුතු බව අපි මෙයින් යෝජනා කර සිටිමු.
8 වැනි යෝජනාව - කලාපීය මූල මහා පිරිවෙන් ආයතනයක් පිහිටුවීම
ශ්රී ලංකාද්වීපය ඈත අතීතයෙහි සිට ම බෞද්ධ අධ්යාපනික මධ්යස්ථානයක් වශයෙන් ලෝක ප්රසිද්ධ වී තිබිණි. චීන ජාතික ෆාෂියැන් හිමින්ගේ ලංකාගමනය ඇතුළු කරුණු ගණනාවකින් එය සනාථ වෙයි. විද්යොදය සහ විද්යාලංකාර මහා පිරිවෙන් ඒ ආකාරයෙන් ම පවතින කල ඒවායින් බිහි කළ බෞද්ධ විද්වතුන් ප්රමාණය අති මහත් ය. සාමනේර හිමිවරු කුඩා කල සිට ම පිරිවෙන් අධ්යාපනය ලබා ගනිති. එ ලෙස කුඩා කල සිට දීර්ඝ කාලයක් අධ්යාපනය ලබා ශාසනය බබලවන මහා පඬි හිමි රුවන් බවට ඒ හිමිවරු පත්වෙති. මෙම පුහුණුව විශ්වවිද්යාලයකින් ලැබෙන්නේ නැත. එහෙයින් ථෙරවාදී කලාපයේ බෞද්ධ අධ්යාපනය වෙනුවෙන් ජාත්යන්තර මට්ටමේ මූල මහා පිරිවෙනක් පිහිටවිය යුතු බව අපි මෙයින් යෝජනා කරමු.
9 වැනි යෝජනාව - ථෙරවාද කලාප මහ ලේකම් කාර්යාලයක් පිහිටුවීම
ථෙරවාද කලාපයේ රටවල් සහ ප්රදේශ අතර සබඳතා කළමනාකරණයට සහ ඒ සඳහා අවශ්ය මගපෙන්වීම් සහ උපදේශන සේවා සැපයීම සඳහා පූර්ණ බලතල ඇති මහ ලේකම් කාර්යාලයක් පිහිටුවන ලෙස මෙයින් අපි යෝජනා කර සිටිමු.
10 වැනි යෝජනාව - රාජ්ය නායක මට්ටමින් ථෙරවාද කලාපීය සංවිධානයක් පිහිටුවීම
කලාපීය වශයෙන් ද, ගෝලීය වශයෙන් ද විවිධ අවශ්යතා සඳහා සංවිධාන පිහිටුවා ගෙන තිබේ. එ නමුදු, ථෙරවාද කලාපය තුළ රාජ්ය මට්ටමේ සහයෝගීතාව සියලු මට්ටමින් පවත්වා ගෙන යෑම සඳහා අවශ්ය නායකත්වය සපයන රාජ්ය නායක මට්ටමේ සංවිධානයක් තවමත් ඇති කරගෙන නොමැත. එහෙයින් උක්ත මූලික අවශ්යතා සම්පාදනයෙන් අනතුරුව රාජ්ය නායක මට්ටමේ කලාපීය සංවිධානයක් පිහිටුවීමට කටයුතු කරන මෙන් අපි මෙයින් යෝජනා කර සිටිමු.
උපදේශක සභාව
ථෙරවාදී කලාපයේ රාජ්යයන් අතර සබඳතා තර කරන මෙම සද්කාර්යය සඳහා අවශ්ය උපදෙස් සහ මගපෙන්වීම් ලබාදීම උදෙසා ත්රෛනිකායික මහා නායක ස්වාමීන්වහන්සේලා ප්රමුඛ අති පූජ්ය භික්ෂුන්වහන්සේලා පිරිසකගෙන් ද මෙම කාර්යය වෙනුවෙන් නායකත්වය දිය හැකි ගිහි පරිසකින් ද සමන්විත උපදේශක සභාවක් පත් කරන මෙන් ද මෙයින් යෝජනා කර සිටිමු.
මෙම උපදේශක සභාවෙහි ගිහි පාර්ශ්වය නියෝජනය කිරීම සඳහා මහාචාර්ය නලින් ද සිල්වා, මහාචාර්ය චන්න ජයසුමන, මහනුවර විද්වතුන්ගේ සහ වෘත්තීයවේදීන්ගේ සංගමය වෙනුවෙන් මහාචාර්ය කේ. එම්. විජේරත්න සහ ජනාධිපති නීතිඥ සමන්ත රත්වත්තේ යන මහත්වරුන්ගේ නම් අපි යෝජනා කර සිටිමු.
මානව සම්පත් ලේඛනය - 1
ථෙරවාදී කලාපයත් සමඟ සබඳතා තර කරගන්නා මෙම ව්යායාමය සාර්ථක කර ගැනීම සඳහා ඒ වෙනුවෙන් කැපවිය හැකි දේශප්රේමී, ශාසනාලයෙන් යුතු පිරිසක් තානාපති සේවයට සම්බන්ධ කරගත යුතු බව ද අපි යෝජනා කර සිටිමු.
මේ සඳහා පහත සඳහන් අය කෙරෙහි අවධානය යොමු කරන මෙන් ද මෙයින් ඉල්ලා සිටිමු.
- විශ්රාමික මේජර් ජෙනරල් ලලිත් දවුලගල
- ආචාර්ය වරුණ චන්ද්රකීර්ති
- ජ්යෙෂ්ඨ කථිකාචාර්ය සුමේධ වීරවර්ධන
- ආචාර්ය අබේ රත්නායක
- ආචාර්ය ලිලන්ත සමරනායක
- ජ්යෙෂ්ඨ කථිකාචාර්ය සේනාරත්න කාරියවසම්
මානව සම්පත් ලේඛනය - 2
ථෙරවාද කලාපය සමඟ සබඳතා තර කර ගැනීම අරභයා ආරම්භ කරනු ලබන මෙම කාර්යයේ ඉදිරි ප්රගමනය වෙනුවෙන් ඒ ආශ්රිත කරුණුවලට අදාළ පර්යේෂණ අඛණ්ඩව සිදු කළ යුතු වේ. ඒ වෙනුවෙන් ශාස්ත්රඥයන්ගේ පර්ෂදයක් ස්ථාපනය කර එහි සාමාජිකයන් ද අදාළ තානාපති සහ ප්රදූත කාර්යාලවලට අනුයුක්ත කරන මෙන් මෙයින් ඉල්ලා සිටිමු.
අවශ්ය දැනුම සහ කැපවීම ඇති පහත සඳහන් විද්වතුන් මෙම කාර්යය උදෙසා අපි යෝජනා කරමු.
- ජ්යෙෂ්ඨ කථිකාචාර්ය චන්දිම බණ්ඩාර අඹන්වල
- ශාස්ත්රපති ධනේෂ් විසුම්පෙරුම
- ජ්යෙෂ්ඨ කථිකාචාර්ය ඉෂන්ක මල්සිරි
- ගෞරව ශාස්ත්රවේදී සමීර ප්රසංග
- ඉංජිනේරු අනුරාධ පියදාස
- ආචාර්ය සසිත් රාජසූරිය
- දිහාන් බණ්ඩාර කීරියවත්ත
- ආචාර්ය ජානක වංශපුර
